Мадриднинг «Атлетико» клуби бош мураббийи Диего Симеоне жамоанинг мавсумдаги натижалари ва асосий мақсадлари ҳақида ўз фикрларини билдириб ўтди.

Мутахассиснинг таъкидлашича, кейинги мавсум учун Чемпионлар лигаси йўлланмасини кафолатлаш муҳим, бироқ клуб доимо юқорироқ мақсадларни кўзлайди. «Асосий мақсадимиз, худди «Барселона» ва «Реал» каби чемпионлик учун курашишдир», — деди Симеоне.

Мураббий якунланаётган мавсумни «тушунтириш қийин бўлган мураккаб давр» деб атади. Унинг сўзларига кўра, жамоа Кубок баҳсларида пенальтилар сериясида имкониятни бой берган бўлса, Чемпионлар лигасида «Барселона»га қарши чорак финалда бор кучини сарфлаб, ажойиб ўйин кўрсатган. Бироқ ярим финалда «Арсенал»га мағлуб бўлиб (умумий ҳисоб 1:2), мусобақани тарк этиш жамоа учун катта зарба бўлган.

«Мақсадга шунчалик яқин келиб, тўхташ жуда аламли. Лекин икки кунлик ғазабдан кейин биз яна курашишда давом этамиз», — дея қўшимча қилди мураббий.

Маълумот учун, ҳозирда «Атлетико» Ла Лига турнир жадвалида 63 очко билан 4-ўринни эгаллаб турибди.