Сергей Чигодаев бошқарувидаги Ўзбекистон U-17 терма жамоаси ўсмирлар ўртасидаги 2026 йилги Осиё Кубогида ўз иштирокини бошлади. 2-тур доирасида Ҳиндистонни йирик — 3:0 ҳисобида таслим этган “оқ бўрилар” 2026-йилги U-17 Жаҳон чемпионатига йўлланмани қўлга киритди.

Қуръа натижаларига кўра, Ўзбекистон, Австралия ва Ҳиндистон билан бир гуруҳдан ўрин олган КХДР U-17 терма жамоаси Осиё кубоги мусобақасида иштирок эта олмаслиги маълум бўлди. Шу сабабли, Ўзбекистон U-17 терма жамоаси 1-турни ўтказиб юборди ва 2-турдаги ғалаба эвазига кичик мундиалга йўл олди.

Голларга 32-дақиқада Лазиз Абдураимов (пенальти), 77-дақиқада Аҳрорбек Равшанбеков муаллифлик қилган бўлса, 61-дақиқада ҳиндистонлик футболчи ўз дарвозасига гол киритди.

3-тур учрашуви 13 май куни Австралияга қарши бўлиб ўтади. Австралия 1-турда Ҳиндистонни мағлуб этган эди. Ўзбекистоннинг ғалабаси эвазига яшил қитъа вакиллари ҳам Жаҳон чемпионати иштирокчисига айланди.

Мусобақа регламентига кўра, гуруҳда 1 ва 2-ўринни эгаллаган жамоалар плей-офф босқичи ва 2026 йил Қатар мезбонлик қиладиган U-17 Жаҳон чемпионати “чиптаси”га эга бўлади.

Маълумот учун, мазкур мусобақа Осиё футбол конфедерацияси томонидан 21-марта ташкил этилмоқда. Ўзбекистон мазкур турнирнинг амалдаги ғолиби ҳисобланади. 2025 йил апрель ойида Саудия Арабистонининг Жидда ва Тоиф шаҳарларида ўтказилган қитъа чемпионатида Исломбек Исмоилов бошқарувидаги Ўзбекистон ўсмирлар терма жамоаси ўтказилган 6 та учрашувнинг барчасида ғалаба қозониб, бош совринга эга чиққан эди.