«Барселона» «Эл-Класико»да ғалаба қозониб, муддатидан олдин Испания чемпионига айланди. «Кўк-анорранглилар» «Камп Ноу»да Маркус Рэшфорд ва Ферран Торреснинг 9 ва 18-дақиқаларда урган голлари эвазига Мадриднинг «Реал» клубини мағлуб этди.

Ханс-Дитер Флик жамоаси мавсум якунланишига уч тур қолганда «қаймоқранглилар»ни 14 очкога ортда қолдирмоқда. Германиялик мутахассиснинг сўзларига кўра, жамоада қолган ўйинлар учун ҳам мотивация етарли.

«Биз Ла Лигада 100 очко жамғармоқчимиз. Бу бизнинг навбатдаги мақсадимиз», — деди Флик «Реал» устидан қозонилган ғалабадан кейинги интервьюсида.

Каталонияликлар чемпионатни уч хонали очко кўрсаткичи билан якунлашлари учун қолган барча учта учрашувда ғалаба қозонишлари талаб этилади.