«Манчестер Сити» ҳимоячиси Жон Стоунс ва ярим ҳимоячи Бернарду Силва жамоадошлари билан хайрлашиш мақсадида махсус кеча ташкил этди.

Ҳар икки футболчининг клуб билан амалдаги шартномаси якунига етмоқда ва улар ёзда эркин агент сифатида жамоани тарк этади. Шу муносабат билан ташкил этилган хайрлашув зиёфатига «шаҳарликлар»нинг барча футболчилари ва уларнинг оила аъзолари таклиф қилинди.

Тадбир тафсилотлари футболчиларнинг ижтимоий тармоқлардаги саҳифалари орқали маълум бўлди.

Меҳмонларга тақдим этилган салфеткаларда «Бернарду ва Жон — «мангуга кўклар» (Bernardo & John — forever Blues) деб ёзилган.

Шунингдек, кечада клуб рамзига мос равишда безатилган коктейллар улашилган. Хусусан, ичимликлар менюсидан «Чемпионлик мартиниси» ва «Бернарду» номли ичимликлар жой олган.