«Реал» бош мураббийи Альваро Арбелоа ўз келажаги ва мавсум якунидаги вазифалар ҳақида фикр билдирди.

Кеча Ла Лиганинг 35-тури доирасида «Мадрид» сафарда «Барселона»га имкониятни бой берди (0:2). Ушбу ғалабадан сўнг каталонияликлар чемпионликни қўлга киритишди.

«Биз доимгидек клуб раҳбарияти билан албатта гаплашиб оламиз. Ҳозирда жамоа мавсумни кўтаринки руҳда якунлашини ва қолган учта ўйинда таслим бўлмаслигини истайман. Яхши машқ қилаётган футболчиларда майдонга тушиш ва мавсумни майдонда тугатиш имконияти бўлади.

Айни дамда мақсадим шу ва яқин икки ҳафта ичида бор эътиборимни айнан шунга қаратаман. Келажакка келсак — буни 24–25 май кунларидан кейин кўриб чиқамиз», — деди Арбелоа.

Эслатиб ўтамиз, Альваро январь ойи бошида Хаби Алонсо ўрнини эгаллаб, «қаймоқранглилар» устозига айланган эди. Унинг бошқарувидаги 25 та ўйинда жамоа 15 та ғалаба, 8 та мағлубият ва 2 та дуранг қайд этди. «Мадрид» ушбу мавсумни совринсиз якунламоқда.