Каталониянинг «Барселона» клуби Мадриднинг «Реал» жамоаси устидан қозонилган ғалаба билан чемпионликни нақд қилиб бўлди. Бироқ бу каталонияликлар бўшашади дегани эмас, чунки жамоа устози Ханс-Дитер Флик ўз шогирдлари олдига янги амбицияли вазифани қўйди — юз очко тўплаш. Бунинг учун қолган барча ўйинларда ғалаба қозониш талаб этилади.
«Мен ва футболчилар юз очколик довонга етмоқчимиз. Бунинг учун олдимизда учта ўйин бор ва уларнинг барчасида ғалаба қозонишимиз керак», — дея Фликнинг сўзларини келтиради клуб расмий сайти.
Эслатиб ўтамиз, «Барселона» ўз тарихида фақат бир марта бу натижани қайд этган — 2012/2013 йилги мавсумда марҳум Тито Виланова қўл остида жамоа 100 очко жамғарган эди.
