«Брайтон» ва Япония терма жамоаси вингери Каору Митома Шимолий Америкада бўлиб ўтадиган Жаҳон чемпионатида ўз жамоасига ёрдам бера олмайдиган бўлди. Япония оммавий ахборот воситаларининг хабар беришича, Митоманинг 9 май куни «Вулверхэмптон»га қарши ўйинда олган жароҳати кутилганидан анча жиддий бўлиб чиқди.
Япония терма жамоаси устози Хажиме Мориясу ушбу ҳафтада (15 май куни) ЖЧ-2026 учун якуний таркибни эълон қилиши керак эди, бироқ Митоманинг чап оёқ сонидаги жароҳати сабабли унинг турнирда иштирок этиш имконияти йўққа чиқди.
Япония терма жамоасининг ЖЧ-2026 гуруҳ босқичидаги тақвими:
14 июнь: Япония — Нидерландия
20 июнь: Япония — Тунис
25 июнь: Япония — Швеция
Митома жорий мавсумда «Брайтон» сафида 27 та ўйинда майдонга тушиб, АПЛда 3 та гол ва битта голли узатмага муаллифлик қилган эди. Шунингдек, у яқинда Англия терма жамоасига қарши кечган ўртоқлик учрашувида Японияга ғалаба келтирувчи голни урган эди. Унинг йўқлиги «самурайлар» учун катта йўқотиш бўлиши кутилмоқда.
