Мадриднинг «Реал» клуби ярим ҳимоячиси Арда Гюлер Ла Лиганинг жорий мавсумида ноёб статистик кўрсаткич қайд этди. 21 ёшли туркиялик футболчи Испания чемпионати доирасида 70 та хавфли вазият яратди — бу клубнинг сўнгги йиллардаги энг яхши натижасидир. Бу ҳақда Madrid Muse хабар тарқатди.

Маълумотларга кўра, «қаймоқранглилар»нинг ҳеч бир футболчиси 2019/20 йилги мавсумдан бери бундай кўрсаткичга эришмаган эди. Ушбу давр ичидаги иккинчи натижа Винисиус Жуниорга тегишли бўлиб, у 2021/22 йилги мавсумда 68 та хавфли вазият яратган. Кучли учликни Тони Кроос якунлаб турибди — германиялик ярим ҳимоячи 2020/21 йилги мавсумда жамоадошларига 67 та зарба бериш имкониятини яратиб берган.

Жорий мавсумда Арда Гюлер Ла Лига доирасида 32 та учрашувда майдонга тушиб, ўз ҳисобига 4 та гол ва 9 та голли узатмани ёзиб қўйишга муваффақ бўлди.