Madridning «Real» klubi yarim himoyachisi Arda Gyuler La Liganing joriy mavsumida noyob statistik ko‘rsatkich qayd etdi. 21 yoshli turkiyalik futbolchi Ispaniya chempionati doirasida 70 ta xavfli vaziyat yaratdi — bu klubning so‘nggi yillardagi eng yaxshi natijasidir. Bu haqda Madrid Muse xabar tarqatdi.

Ma’lumotlarga ko‘ra, «qaymoqranglilar»ning hech bir futbolchisi 2019/20 yilgi mavsumdan beri bunday ko‘rsatkichga erishmagan edi. Ushbu davr ichidagi ikkinchi natija Vinisius Juniorga tegishli bo‘lib, u 2021/22 yilgi mavsumda 68 ta xavfli vaziyat yaratgan. Kuchli uchlikni Toni Kroos yakunlab turibdi — germaniyalik yarim himoyachi 2020/21 yilgi mavsumda jamoadoshlariga 67 ta zarba berish imkoniyatini yaratib bergan.

Joriy mavsumda Arda Gyuler La Liga doirasida 32 ta uchrashuvda maydonga tushib, o‘z hisobiga 4 ta gol va 9 ta golli uzatmani yozib qo‘yishga muvaffaq bo‘ldi.