Мадриднинг «Реал» клуби бош мураббийи Альваро Арбелоа Ла Лига 36-тури доирасидаги «Овьедо»га қарши ўйин олдидан ўтказилган матбуот анжуманида футболчилар билан ишлаш услуби ҳақида гапирди.
Мураббийнинг ОАВ олдида футболчиларини ҳимоя қилиши ва баъзилар уни «юмшоқ мутахассис» деб ҳисоблаши борасидаги фикрига Арбелоа қуйидагича жавоб берди:
«Қарорларимга нисбатан бўлаётган танқидларни тушунаман. Мен кўпинча ўйлаганларимни айтаман, баъзида эса айтишим керак бўлган гапларни гапираман. Лекин мен футболчиларга айнан шундай муносабатда бўламан ва ёшлар жамоасида ишлаганимда ҳам шундай йўл тутганман. Мураббий ўз футболчилари учун қалқон бўлиши шарт.
Улар билан юзма-юз қолганимда эса, бу ерда айтмаслигим керак бўлган гапларни айтаман. Ва бу доимо ҳурмат доирасида бўлади. Мен талабчан бўлганман, уларни олдинга ундаганман, нима устида ишлаш кераклигини, нимани яхши бажарганимиз-у, қаерда хато қилганимизни тушунтирганман... Ўз ёндашувимни ўзгартирмаган бўлардим», — дейди Арбелоа.
