«Арсенал», «Манчестер Сити» ва Франция терма жамоаси собиқ ҳимоячиси Бакари Санья «Бавария» вингери Майкл Олисенинг жорий мавсумдаги ўйинларига юқори баҳо берди.

Oddschecker нашрига берган интервьюсида Санья «Бавария»нинг ЕЧЛдан чиқиб кетгани футболчининг шахсий ютуқларига таъсир қилишини таъкидлади.

«Менимча, агар у ушбу мавсумда Чемпионлар Лигасида ғолиб чиққанида, «Олтин тўп»ни қўлга киритган бўларди. «Бавария»нинг «ПСЖ»дан мағлуб бўлиб, мусобақани тарк этгани унинг йўлини тўсиб қўйди. Аммо у Бундеслига ва ЕЧЛда феноменал мавсумни ўтказди. Олисе майдондаги ҳақиқий рассомдир.

Афсуски, одамларнинг хотираси қисқа. Кўпчилик фақат «ПСЖ»га қарши ўйинни эслаб қолади ва уни танқид қилишни бошлади. Бу эса «Олтин тўп» учун курашда унга қарши ишлайди. У кучли учликка кирмаса керак, аммо яқин 3-4 йил ичида бу совринни қўлга киритишига ишонаман», — дейди Санья.

Шунингдек, собиқ футболчи «Бавария»нинг еврокубоклардаги иштирокига тўхталар экан, «ПСЖ»га қарши дастлабки ўйиндаги 20 дақиқалик омадсизлик ва жавоб учрашувидаги ҳакамларнинг қарорлари жамоага қимматга тушганини таъкидлади.

Маълумот учун, Майкл Олисе жорий мавсумда «Бавария» сафида барча турнирларда 50 та ўйинда майдонга тушиб, 22 та гол урди ва 30 та голли узатмани амалга оширди.