Лионель Месси МЛС доирасида кечган голларга бой баҳсда «Интер Майами»га «Цинциннати» устидан ғалаба қозонишга ёрдам берди (5:3).

38 ёшли ҳужумчи учрашувнинг 24 ва 55-дақиқаларида рақиб дарвозасини ишғол қилиб, дублга эришди. Гарчи айрим манбалар 89-дақиқадаги голни ҳам аргентиналик юлдуз номига ёзишаётган бўлса-да, МЛС расман бу вазиятни «Цинциннати» футболчисининг автоголи сифатида қайд этди.

Ушбу дублдан сўнг Мессининг жорий мавсумдаги голлари сони 11 тага етди. У тўпурарлар пойгасида «Даллас» аъзоси Петар Муса билан биргаликда иккинчи ўринни эгаллаб турибди. Айни дамда «Чикаго» ҳужумчиси Уго Кёйперс 12 та гол билан пешқадамлик қилмоқда.

Шу тариқа, «Интер Майами» 25 очко билан Шарқий конференцияда иккинчи ўринда бормоқда. «Фламинголар» фақатгина «Нэшвилл»дан (27 очко) ортда қолишмоқда.