Испания Ла Лигасининг 36-турида «Барселона» меҳмонда «Алавес»га 0:1 ҳисобида имкониятни бой берди. Ушбу учрашувга каталонияликлар муддатидан олдин чемпион сифатида етиб келишган эди, бундан эса лигада қолиш учун курашаётган мезбонлар унумли фойдаланиб кетишди.
Barca Universal нашрининг қайд этишича, «кўк-анорранглилар» тўртинчи бор қаторасига чемпионликни қўлга киритганидан кейинги илк ўйинда мағлубиятга учрамоқда. Бу ғалати серия 2019 йилда «Сельта»дан қабул қилинган мағлубият билан бошланган эди. Кейинчалик 2023 йилда «Реал Сосьедад», 2025 йилда эса «Вильярреал» жамоалари янги чемпионни мағлуб этишган.
Шундай қилиб, Ханс-Дитер Флик шогирдлари ушбу нохуш анъанани 2026 йилда ҳам давом эттиришди. Шунга қарамай, «Барселона» турнир жадвалида энг яқин таъқибчиси «Реал Мадрид»ни 14 очкога ортда қолдириб, яққол пешқадамлик қилмоқда.
