АҚШ, Канада ва Мексика мезбонлик қиладиган футбол бўйича 2026-йилги Жаҳон чемпионатининг финал ўйини танаффусида Мадонна, Шакира ҳамда Жанубий Кореянинг BTS гуруҳи қўшиқ айтади. Бу ҳақда турнирнинг Х ижтимоий тармоғидаги расмий саҳифасида маълум қилинди.
Жаҳон чемпионати 11-июндан 19-июльга қадар давом этади. Ҳал қилувчи финал учрашуви АҚШнинг Ню-Жерси штатидаги “Метлайф” стадионида бўлиб ўтиши белгиланган.
Финалдаги шоу дастури ФИФА'нинг глобал таълим жамғармасини қўллаб-қувватлаш мақсадида ташкил этилади. Ташаббус доирасида 100 миллион доллар маблағ йиғиш режалаштирилган бўлиб, ушбу маблағлар бутун дунё бўйлаб болаларнинг таълим ва футболга бўлган имкониятларини кенгайтиришга йўналтирилади. Қайд этилишича, турнир давомида сотилган ҳар бир чиптадан 1 доллар миқдоридаги маблағ мазкур хайрия жамғармасига ўтказилади.
