Мадриднинг «Реал» клуби ҳужумчиси Килиан Мбаппе нега жамоанинг сўнгги икки ўйинида иштирок этмагани ҳақида фикр билдирди.

Аввалроқ француз футболчиси жароҳати сабаб «Эспаньол» ва «Барселона»га қарши учрашувларни ўтказиб юборгани хабар қилинганди. «Овьедо»га қарши баҳсда эса у 69-дақиқада майдонга тушди ва голли узатма муаллифи бўлди.

“Мен 100 фоиз тайёрман ва ўйнашга шайман. Нега ўйнамаганимни билмоқчимисиз? Буни мураббийдан сўранг”, — деди Мбаппе.

Шунингдек, ҳужумчи жамоадаги ҳозирги мақоми ҳақида ҳам гапирди.

“Мен асосий таркибда тушишга тайёр эдим, аммо Арбелоа менга ҳозир тўртинчи ҳужумчи эканлигимни айтди. Ҳечқиси йўқ, мураббий қарорини қабул қилиш керак. Мен янада қаттиқроқ ишлайман”, — деди француз футболчиси.

Мбаппе жорий мавсум барча мусобақаларда 42 та ўйинда иштирок этиб, 41 та гол ва 7 та голли узатмага муаллифлик қилди.