Лионель Месси МЛС доирасидаги «Цинциннати»га қарши кечган сўнгги ўйинда дубль қайд этди. Аргентиналик юлдуз учрашувнинг 24 ва 55-дақиқаларида гол уриб, «Интер Майами»нинг 5:3 ҳисобидаги ғалабасини таъминлади.
«Inter Miami News Hub» нашрининг хабар беришича, Месси икки ва ундан ортиқ гол урилган ўйинлар сони бўйича Криштиану Роналдунинг рекордини такрорлади — эндиликда ҳар икки футболчида бундай ўйинлар сони 240 тани ташкил этмоқда. Диққатга сазовор жиҳати шундаки, Лионель бу натижага эришиш учун португалиялик «рақиби»га қараганда 168 та камроқ учрашувда майдонга тушган.
Месси МЛСнинг жорий мавсуми тўпурарлар рўйхатида 11 та гол билан иккинчи ўринда бормоқда. Июнь ойида саккиз карра «Олтин тўп» соҳиби 39 ёшга тўлади. Ҳозирда «Ан-Наср»да тўп тепаётган Роналду эса шу йилнинг февралида 41 ёшини қаршилаган эди.
