Мадриднинг "Реал" клуби ҳужумчиси Килиан Мбаппе ОАВ вакиллари билан суҳбатда жамоадошлари — уругвайлик Федерико Вальверде ва франциялик Орельен Тчуамени ўртасидаги муштлашув ҳақидаги саволга жавоб берди.
"Ҳеч нарсани тасдиқлай олмайман, мен у ерда эмасдим. Мен кетиб бўлгандим ва содир бўлган воқеадан хабарим йўқ эди. Менда ҳам худди сизлардаги каби маълумотлар бор, холос", — дея юлдуз ҳужумчининг сўзларини келтиради Managing Madrid нашри.
Эслатиб ўтамиз, муштлашувдан сўнг Вальверде ва Тчуамени 500 минг евро миқдорида жаримага тортилди.
Испания Ла Лигасининг 36 туридан сўнг "қироллик клуби" 80 очко билан турнир жадвалида иккинчи ўринни эгаллаб турибди. Сўнгги учрашувда "қаймоқранглилар" "Овьедо" жамоасини 2:0 ҳисобида мағлуб этишди.
