«Ливерпуль» бош мураббийи Арне Слот мавсумнинг сўнгги учрашувида мухлисларнинг қўллаб-қувватлашига умид қилмоқда. Жума куни «қизиллар» мавсумдаги охирги сафар ўйинида «Астон Вилла»дан мағлубиятга учрашди (2:4). Премьер-лиганинг якуний турида мерсисайдликлар ўз майдонларида «Брентфорд»га қарши баҳс олиб боришади.

«Муваффақиятсиз натижалар туфайли ҳозир устимизда катта босим бор, гарчи бутун мавсум давомида шундай бўлгандек туйилса-да. Айни дамда қўлимиздан келадиган ягона иш – бўлажак ўйинга иложи борича яхшироқ тайёргарлик кўришдир. Олдинда бизни узоқ ҳафта кутмоқда. Мухлислар бизни қўллаб-қувватлайди деб умид қиламан. Биз «Энфилд»да фанатларнинг далдаси биз учун қанчалик муҳимлигини, бу жипслик жамоага қандай ёрдам беришини кўп бор кўрганмиз. Бироқ биз ҳам дастлабки дақиқалардан бошлаб ушбу қўллаб-қувватлашга лойиқ эканлигимизни кўрсатишимиз керак», – деди Слот матбуот анжуманида.

«Ливерпуль» ўзаро ўйиндаги мағлубиятдан сўнг турнир жадвалидаги тўртинчи ўринни «Астон Вилла»га бой бериб қўйди.