«Liverpul» bosh murabbiyi Arne Slot mavsumning so‘nggi uchrashuvida muxlislarning qo‘llab-quvvatlashiga umid qilmoqda. Juma kuni «qizillar» mavsumdagi oxirgi safar o‘yinida «Aston Villa»dan mag‘lubiyatga uchrashdi (2:4). Premyer-liganing yakuniy turida mersisaydliklar o‘z maydonlarida «Brentford»ga qarshi bahs olib borishadi.
«Muvaffaqiyatsiz natijalar tufayli hozir ustimizda katta bosim bor, garchi butun mavsum davomida shunday bo‘lgandek tuyilsa-da. Ayni damda qo‘limizdan keladigan yagona ish – bo‘lajak o‘yinga iloji boricha yaxshiroq tayyorgarlik ko‘rishdir. Oldinda bizni uzoq hafta kutmoqda. Muxlislar bizni qo‘llab-quvvatlaydi deb umid qilaman. Biz «Enfild»da fanatlarning daldasi biz uchun qanchalik muhimligini, bu jipslik jamoaga qanday yordam berishini ko‘p bor ko‘rganmiz. Biroq biz ham dastlabki daqiqalardan boshlab ushbu qo‘llab-quvvatlashga loyiq ekanligimizni ko‘rsatishimiz kerak», – dedi Slot matbuot anjumanida.
«Liverpul» o‘zaro o‘yindagi mag‘lubiyatdan so‘ng turnir jadvalidagi to‘rtinchi o‘rinni «Aston Villa»ga boy berib qo‘ydi.
