Лондоннинг «Арсенал» клуби 20 ёшли ярим ҳимоячи Виктор Фрохольдт учун курашга киришишга тайёр. Бу ҳақда The Sun нашри хабар бермоқда.

Даниялик футболчи жорий мавсумда «Порту»нинг Португалия чемпионатида ғолиб чиқишига ўз ҳиссасини қўшди. «Канонирлар» Кристиан Нёргорнинг жамоани тарк этиши мумкинлиги фонида янги хавбек қидиришмоқда. Фрохольдтга шунингдек, «Ливерпуль», «Манчестер Юнайтед» ва «Ньюкасл» клублари ҳам қизиқиш билдирмоқда.

«Порту» шу ёзда футболчи билан хайрлашиш ниятида эмас. Ярим ҳимоячининг шартномаси яна 4 йилга мўлжалланган бўлиб, унда 80 миллион евро миқдорида товон пули белгиланган. Клуб раҳбарияти футболчининг ўзи ҳам жамоадан кетишга шошилмаяпти, деб ҳисоблайди.

Жорий мавсумда Фрохольдт «Порту» сафида барча мусобақаларда 50 та ўйинда майдонга тушиб, 8 та гол урди ва 6 та голли узатмани амалга оширди. Шунингдек, у «Копенгаген» таркибида ҳам 1 та учрашувда қатнашган.