Мадриднинг «Реал» клуби ярим ҳимоячиси Эдуардо Камавинга кейинги мавсумдан нималар кутаётгани ҳақида гапирди. Жорий мавсум «қаймоқранглилар» учун муваффақиятсиз кечди — жамоа бирорта ҳам соврин қўлга кирита олмади. Ла Лигада мадридликлар бундан бир ҳафта олдин «Эл-Класико»да «Барселона»га имкониятни бой бериб, чемпионлик умидларидан муддатидан олдин маҳрум бўлишганди.
«Реал»да ўйнаш — бу орзу ва улкан бахт. Болалигимданоқ шу ерда тўп суришни хоҳлардим. Энди биз келажакда қандай қилиб муваффақиятга эришиш ҳақида ўйлашимиз керак. Кейинги мавсумда биз ҳамма совринни ютишимиз шарт», — дея таъкидлади Камавинга якшанба куни чемпионатнинг 37-тури доирасида «Севилья» устидан қозонилган ғалабадан (1:0) кейин берган интервьюсида.
Альваро Арбелоа шогирдлари сўнгги тур олдидан «Барса»дан 11 очкога ортда қолмоқда.
