Испаниянинг «Бетис» клуби якшанба оқшомида Каталониянинг «Барселона»сидан мағлубиятга учраганига қарамай, кейинги мавсумда Чемпионлар лигасида қатнашиш йўлланмасини қўлга киритди. «Бетис» ўз тарихида иккинчи бор ушбу турнирда иштирок этади, жамоа илк бор 2005/2006 йилги мавсумда ЕЧЛда дебют қилган эди.

Агар Иско клубда яна бир мавсум қолса, у Европа футболининг энг нуфузли клублик турнирига қайтиши мумкин. Шунингдек, у Чемпионлар лигаси тарихида бир йўла бешта ҳар хил клуб сафида майдонга тушган илк футболчига айланиши кутилмоқда.

Бунгача Иско ушбу турнирда «Малага», «Валенсия», «Севилья» ва Мадриднинг «Реал» клублари шарафини ҳимоя қилган. Қизиғи, бу бешта клубнинг барчаси Испания вакилларидир.