Мадриднинг «Атлетико» клуби ҳужумчиси Антуан Гризманн клуб мухлисларига видолашув сўзлари билан юзланди ва ўз вақтида «Барселона»га ўтгани учун улардан кечирим сўради. Илгарироқ 35 ёшли футболчи жорий мавсум якунланганидан кейин «Атлетико»ни тарк этиши ва фаолиятини МЛСнинг «Орландо Сити» клубида давом эттириши маълум бўлган эди.
«Биринчи навбатда, шу ерда қолганингиз учун раҳмат. Бу мен учун жуда катта аҳамиятга эга. Биламан, мухлисларнинг бир қисми мени ҳалигача кечирмаган, аммо улардан яна бир бор узр сўрамоқчиман. Ўшанда мени бу ерда қанчалик қадрлашларини тушунмаган эканман. Ёш эдим, хатога йўл қўйдим, кейин эса қароримни ўзгартирдим ва орқага қайта олиш ҳамда бу туйғуларни қайта ҳис қилиш учун қўлимиздан келган барча ишларни қилдик.
2014 йилдан буён бирга тўп сурган барча жамоадошларимга миннатдорчилик билдираман. Сизлар билан бирга ғалаба ва мағлубиятларни, машғулоту ўйинларни баҳам кўриш жуда муҳим эди. Физиотерапевтлар ва экипировка усталарига раҳмат — улар доим биринчи бўлиб келишади ва энг охирида кетишади. Мураббийлар штабига ва алоҳида тарзда Диего Пабло Симеонега раҳмат — айнан у ҳамма нарсани ўзгартириб юборди. Сизлар туфайли ушбу стадионда ҳақиқий эҳтирос бор. Сизлар сабабли мен Жаҳон чемпиони бўлдим ва ўзимни энг яхшилардан бири сифатида ҳис қилдим. Сизлардан жуда кўп қарздорман. Сизлар учун ўйнаш мен учун шараф эди.
Қийин дақиқаларда мени қўллаб-қувватлагани, сабр қилгани ва мағлубиятларни мен билан бирга бошдан кечиргани учун рафиқамга раҳмат айтаман. Сени яхши кўраман. Отамга раҳмат — у мен профессионал жамоага кира олишим учун 13 ёшлигимда бутун Франция бўйлаб мени машинада олиб юрган. Бир томонга 4-6 соатлаб йўл юрардик. Отам туфайли мен шу ердаман ва футболдан завқ олмоқдаман.
Мен жамоа билан Испания чемпионлигини ёки Чемпионлар лигасини юта олмадим, аммо бугунги ғалаба мен учун алоҳида аҳамиятга эга. Сизларнинг меҳр-муҳаббатингизни бутун умрга қалбимда сақлайман. Ва ниҳоят, фарзандларингизни бу ерга олиб келиб, уларга дунёнинг энг яхши клуби — «Атлетико» қандай бўлишини кўрсатганингиз учун раҳмат», — дея Гризманннинг сўзларини келтирмоқда AS нашри.
Гризманн Мадрид клуби шарафини 2014 йилдан 2019 йилгача ҳимоя қилган, шундан сўнг «Барселона»га ўтган ва 2021 йилда яна ортга қайтган эди. «Атлетико» таркибида франциялик форвард Европа лигаси ғолиби, УЕФА Суперкубоги ва Испания Суперкубоги соҳибига айланган.
