Якшанба куни, 17 май куни Франция Лига 1 нинг 2025/2026 йилги мавсуми сўнгги тури ўйинлари бўлиб ўтди. 34-тур якунларига кўра, кейинги 2026/2027 йилги мавсумда Франция шарафини УЕФА Чемпионлар Лигаси, УЕФА Европа Лигаси ва УЕФА Конференциялар Лигасида ҳимоя қиладиган жамоалар номи маълум бўлди.

Қитъанинг энг нуфузли клублар турнири — Чемпионлар Лигасининг умумий босқичига мамлакат чемпиони «ПСЖ» ҳамда ички биринчилик совриндорлари бўлмиш «Ланс» ва «Лилль» клублари тўғридан-тўғри йўлланма олди. Мусобақа жадвалида тўртинчи ўринни эгаллаган «Лион» эса турнирни учинчи квалификация (саралаш) босқичидан бошлайди.

Европа Лигасида «Марсель» клуби иштирок этади. Франция чемпионатини олтинчи ўринда якунлаган «Ренн» эса Конференциялар Лигаси йўлланмасини қўлга киритди.

Францияда футбол мавсуми 22 май куни бўлиб ўтадиган «Ланс» ва «Ницца» жамоалари ўртасидаги мамлакат Кубоги финали билан якунига етади.