Таниқли испаниялик журналист Хосеп Педрерол “Севилья”га қарши ўйиндан (1:0) кейин “Реал” кийиниш хонасидаги вазият юзасидан ўз фикрини билдирди. Педреролнинг сўзларига кўра, Хаби Алонсонинг истеъфога чиқиши (кетиши) ортидан Мадрид клуби кийиниш хонасидаги вазият янада таранглашди. Айниқса, Килиан Мбаппе атрофидаги гап-сўзлар қайта авж олди.
“Мбаппе Хаби Алонсога ишонган эди... Бироқ Винисиус ва яна бир нечта футболчи уни сиқиб чиқарди. Менга етказилган маълумотларга кўра, у кийиниш хонасида тамоман ёлғизланиб қолган”, деди журналист ўйиндан кейинги подкастда.
Эслатиб ўтамиз, сўнгги пайтларда матбуотда Мбапенинг жамоадошлари билан муносабатлари ёмонлашгани ҳақидаги хабарлар тез-тез кўзга ташланмоқда. Ҳужумчининг жамоа ўйинларга тайёргарлик кўраётган бир вақтда Италияга сафар қилиши ортидан вазият янада оғирлашгани айтилмоқда.
Маълумот учун, Килиан Мбаппе жорий мавсум 43 та ўйинда 41 та гол уришга муваффақ бўлди. Шунга қарамай, “Реал” учун мавсум ўта оғир кечмоқда: январь ойида Хаби Алонсо ўрнини Арбелоа эгаллади, жамоа эса кетма-кет иккинчи йил йирик совринларсиз қолди.













