«Манчестер Юнайтед»нинг собиқ ҳимоячиси Гари Невилл Пеп Гвардиоланинг «Манчестер Сити»дан кетиши ҳақидаги хабарларга муносабат билдирди.

Бугун Daily Mail нашри испаниялик мураббий Англия чемпионати якунланганидан кейин истеъфога чиқишга қарор қилгани ҳақида хабар берди. Расмий тасдиқ эса якшанба куни кутилмоқда.

«Бу янгилик айнан ҳозир пайдо бўлганидан жуда ҳайратдаман. Гап фақат «Арсенал»нинг ўйинида эмас, балки бу «Манчестер Сити»нинг баҳси арафасида содир бўлганида. Бундай хабарлар воқеалар ривожини бутунлай ўзгартириб юборади.

Мактабда ўқиб юрган пайтларимда Далглишнинг «Ливерпул»ни, кейинчалик сэр Алекс Фергюсоннинг «Манчестер Юнайтед»ни ёки яқинда Юрген Клоппнинг «Ливерпул»ни тарк этиши ҳақидаги хабарларни эшитганим ёдимда. Булар футболдаги жуда муҳим паллалар эди ва Пепнинг кетиши ҳам шундай воқеа бўлади.

«Манчестер Сити» бу янгиликнинг сизиб чиқишига қандай йўл қўйиб берганига тушунмаяпман. Агар бу ҳақиқат бўлса, клуб ҳам, Пеп Гвардиола ҳам хабарнинг айнан ҳозир тарқалганидан жуда қаттиқ хафа бўлишади», — деди Невилл.

Айни дамда АПЛда «Арсенал»дан кейин иккинчи ўринда бораётган «шаҳарликлар» эртага 37-тур доирасида сафарда «Борнмут» меҳмони бўлишади.