«Арсенал» вингери Букайо Сака «Манчестер Юнайтед» ва «Эвертон» собиқ ҳужумчиси Уэйн Рунининг натижасига яқинлашди.
Англия чемпионатининг 37-тури доирасида «Бернли»га қарши кечган баҳсда (1:0) Сака Кай Хавертцнинг голига ассистентлик қилди.
Ҳозирда 24 ёшу 255 кунлик бўлган англиялик футболчи АПЛ тарихида 50 ва ундан ортиқ гол урган ҳамда 50 ва ундан ортиқ голли узатмани амалга оширган энг ёш иккинчи ўйинчига айланди. У фақатгина Уэйн Рунидан ортда қолмоқда (Руни бу натижани 24 ёшу 84 кунлигида қайд этган).
Бундан ташқари, Сака «Арсенал» тарихида Премьер-лига доирасида ҳам голлар, ҳам ассистлар сони бўйича 50 талик довондан ошган учинчи футболчи бўлди. Бунгача лондонликлар сафида фақат Тьерри Анри ва Деннис Бергкамп бундай натижага эришган эди.
