«Ювентус» Браим Диасга қизиқиш билдиришда давом этмоқда. Tuttosport нашрининг хабарига кўра, Турин клуби «Реал» ярим ҳимоячисини ёзги трансфер ойнаси учун асосий мақсадларидан бири сифатида кўрмоқда.

Аслида «бьянконерилар» Бернарду Силва учун курашишни режалаштирган эди, бироқ кейинги мавсумда Чемпионлар Лигасида иштирок этиш кафолатланмагани бу трансферни анча мураккаблаштириб юборди. Молиявий чекловлар сабабли Турин клуби бошқа вариантларга ўтди.

Браим Диаснинг шартномаси 2027 йилгача амал қилади. Сўнгги маълумотларга кўра, унинг Мадриддаги келажаги кўп жиҳатдан Жозе Моуриньога боғлиқ бўлиб турибди. ОАВ португалиялик мутахассисни «Реал»нинг навбатдаги бош мураббийи сифатида тилга олмоқда. Агар Моуриньо футболчининг кетишига қарши бўлмаса, клублар музокараларни бошлаши мумкин.

Жорий мавсумда 27 та ўйинда 5 та голли узатмани амалга оширган футболчининг бозор қиймати 35 миллион еврога баҳоланмоқда.