«Мидлсбро» клуби Англия футбол лигасининг (EFL) «Саутгемптон»ни Чемпионшип плей-офф финалидан четлаштириш ҳақидаги қарорини мамнуният билан кутиб олди.

Аввалроқ, «Саутгемптон» таҳлилчиси плей-офф босқичидаги илк учрашув олдидан «Мидлсбро» жамоасининг машғулотини видеога олаётган ва тактик режаларини суратга тушираётган вақтда қўлга тушган эди. Икки ўйин натижасига кўра, «Саутгемптон» «Мидлсбро»дан устун келиб (0:0, 2:1), финалга йўл олганди. Жамоа 23 май куни АПЛ йўлланмаси учун «Халл Сити»га қарши майдонга тушиши керак эди, бироқ энди уларнинг ўрнини «Мидлсбро» эгаллайди. Шунингдек, ушбу жосуслик ҳолати ва ундан ташқари яна иккита шундай қонунбузарлик учун «авлиёлар»дан кейинги мавсум ҳисобидан 4 очко олиб ташланди.

«Мидлсбро» футбол клуби Интизом қўмитасининг бугунги йиғилиши натижаларини олқишлайди. Бизнингча, бу қарор спорт ҳалоллиги ва хулқ-атвор меъёрлари нуқтаи назаридан футболимиз келажаги учун аниқ ва қатъий сигнал беради.

Ҳозирда клубимиз бор эътиборини шу шанба куни «Уэмбли» стадионида «Халл Сити»га қарши бўлиб ўтадиган ўйинга қаратган. Мухлисларимиз учун чипталар ҳақидаги маълумотлар тез орада эълон қилинади», — дейилади «Мидлсбро» клуби расмий баёнотида.