Англия футбол лигаси (EFL) расмий сайтида «Саутгемптон» клубининг АПЛга йўлланма берувчи Чемпионшип плей-офф босқичидан четлатилгани юзасидан берган апелляцияси рад этилганини эълон қилди.
«Лиганинг арбитраж комиссияси «Саутгемптон» футбол клубининг апелляциясини рад этди. Ушбу қарор шуни англатадики, плей-оффдан четлатиш кўринишидаги дастлабки жазо ўз кучида қолади. Шунингдек, 2026/27 йилги мавсумда жамоадан 4 очко олиб ташланади ва барча айбловлар бўйича ҳайфсан берилади», — дейилади пресс-релизда.
Сешанба куни, 19 май куни лиганинг мустақил интизом қўмитаси «Саутгемптон» клубини плей-офф ярим финалидаги рақиби «Мидлсбро»нинг, шунингдек, мавсум давомида бошқа рақибларининг ҳам машғулотларини хуфёна кузатгани (жосуслик қилгани) учун жазолаган эди.
Шу тариқа, Чемпионшип плей-офф финалида «Халл Сити» ва «Мидлсбро» жамоалари ўзаро тўқнашадиган бўлди. Учрашув шанба куни, 23 май куни «Уэмбли» стадионида бўлиб ўтади. Ўйин Тошкент вақти билан соат 18:30 да бошланади.
