Angliya futbol ligasi (EFL) rasmiy saytida «Sautgempton» klubining APLga yo‘llanma beruvchi Chempionship pley-off bosqichidan chetlatilgani yuzasidan bergan apellyasiyasi rad etilganini e’lon qildi.
«Liganing arbitraj komissiyasi «Sautgempton» futbol klubining apellyasiyasini rad etdi. Ushbu qaror shuni anglatadiki, pley-offdan chetlatish ko‘rinishidagi dastlabki jazo o‘z kuchida qoladi. Shuningdek, 2026/27 yilgi mavsumda jamoadan 4 ochko olib tashlanadi va barcha ayblovlar bo‘yicha hayfsan beriladi», — deyiladi press-relizda.
Seshanba kuni, 19 may kuni liganing mustaqil intizom qo‘mitasi «Sautgempton» klubini pley-off yarim finalidagi raqibi «Midlsbro»ning, shuningdek, mavsum davomida boshqa raqiblarining ham mashg‘ulotlarini xufyona kuzatgani (josuslik qilgani) uchun jazolagan edi.
Shu tariqa, Chempionship pley-off finalida «Xall Siti» va «Midlsbro» jamoalari o‘zaro to‘qnashadigan bo‘ldi. Uchrashuv shanba kuni, 23 may kuni «Uembli» stadionida bo‘lib o‘tadi. O‘yin Toshkent vaqti bilan soat 18:30 da boshlanadi.
