Ҳакамлар техник қўмитаси (CTA) собиқ вице-президенти Хосе Мария Энрикес Негрейранинг соғлиғи ёмонлашди, дея хабар бермоқда El Mundo нашри.

Суд-тиббий экспертизаси унда «Альцгеймер касаллиги эҳтимоли» борлигини тасдиқламоқда, шу сабабли у суд олдида жавоб бера олмайди. Аввалроқ Негрейра судьядан унинг аҳволини баҳолаш учун экспертиза тайинлашни сўраган эди. У судда ўзини лозим даражада ҳимоя қилишига халақит берадиган когнитив бузилишлардан азият чекаётганини маълум қилган.

Эслатиб ўтамиз, «Барселона» клуби ва унинг раҳбарияти Испания қироллик футбол федерациясида (RFEF) фаолият юритган Негрейрага пул тўлагани, яъни пора берганликда айбланган эди. Негрейра «Барса»нинг собиқ президентлари Жозеп Бартомеу ва Сандро Росель билан бир қаторда, 2001 йилдан 2018 йилгача бўлган даврда клубдан 7 миллион евродан ортиқ маблағ олганлик бўйича тергов қилинмоқда.

Қайд этилишича, Негрейранинг аҳволи 2024 йилнинг 18 январида ўтказилган аввалги текширувга қараганда анча ёмонлашган. Шу тариқа, Ҳакамлар техник қўмитаси собиқ вице-президенти суд жараёнида иштирок эта олмайди.

Тиббий кўрик унинг адвокати сўровига биноан ўтказилган бўлиб, ҳимоячи мижозининг соғлиғи кескин ёмонлашгани ва у судда ўзини тўлиқ ҳимоя қила олмаслигини даъво қилган эди. Текширувлар якунда унинг сўзларини тасдиқлади.

Янги тиббий хулосани ҳисобга олган ҳолда, Негрейра ҳозирги оғир соғлиғи сабабли айбланувчилар курсисига ўтира олмайди ва очиқ суд мажлисида қатнашмайди.