«Манчестер Юнайтед»нинг бразилиялик ярим ҳимоячиси Каземиро яқин орада «Интер Майами» футболчисига айланиши мумкин. Бу ҳақда нуфузли инсайдер Фабрицио Романо хабар бермоқда.
Манба берган маълумотга кўра, «Интер Майами» Каземиро бўйича келишувни 2026 йилги Жаҳон чемпионати бошлангунга қадар якунлаш борасида оптимистик кайфиятда. Бразилиялик футболчининг ўзи ҳам бундай қадам ташлашга тайёр.
Каземиро 2022 йилдан бери «Манчестер Юнайтед» шарафини ҳимоя қилиб келмоқда. Жорий мавсумда 34 ёшли ярим ҳимоячи барча турнирларда 35 та ўйин ўтказиб, 9 та гол урди ва 2 та голли узатмани амалга оширди. Каземиронинг «қизил иблислар» билан амалдаги шартномаси июнь ойи охиригача мўлжалланган.
Эслатиб ўтамиз, 2026 йилги Жаҳон чемпионати шу йилнинг 11 июнь куни старт олади.
