ПСЖ бош мураббийи Луис Энрике "Манчестер Сити" бошқараётган Хосеп Гвардиолани мураббий сифатида жаҳон футболига таъсири ҳақида фикр билдирди.
«Хосеп Гвардиолани яна кўп йиллар юқори даражада кўришни истардим, чунки у намуна бўла оладиган мураббий. Мен учун у барча даврларнинг энг яхши мураббийи. Бу совринлар сони учун эмас, балки у қандай ғояларни жорий қилгани, уларни қандай амалга оширгани, ўйинни қандай ўзгартиргани, марказий ҳимоячиларни ёки қанот ҳимоячиларни ярим ҳимояга силжитишга журъат қилгани учун.
Бир куни Гвардиола марказий ҳимоячиларини яна ҳам олдинга чиқаради ва барча унга тақлид қилади. Бундай қобилиятга эга инсонлар жуда кам. Фақат танланганлар ва бу борада у биринчи рақам», — деди Луис Энрике Movistarга берган интервьюсида.
Хосеп Гвардиола ва Луис Энрике футбол тарихида икки хил клуб билан требл ютган ягона мураббийлар ҳисобланади. Гвардиола бу натижани "Барселона" ва "Манчестер Сити" билан, Луис Энрике эса "Барселона" ва "ПСЖ" билан қайд этган.













