«Барселона» ярим ҳимоячиси Френки де Йонг Хави Эрнандес ва Ханс-Дитер Флик билан ўзаро тушуниш борасида ўз фикрларини билдириб ўтди.
Маълумки, немис мутахассиси 2024 йилнинг ёзида «Барселона» бош мураббийлиги лавозимида испаниялик мураббийнинг ўрнини эгаллаган эди.
«Флик майдондаги вазифамни Хавига қараганда яхшироқ тушунадими? Йўқ, менимча, Хави ҳам мени жуда яхши тушунган. Тўғри, бошида айрим масалаларда қарашларимиз турлича бўлган, аммо бу у бу ерда иш бошлаган дастлабки ярим йилдагина кузатилди, холос.
Биз Ла Лигада ғолиб чиққан иккинчи мавсумда эса ҳаммаси анча яхшиланди. Ўша ёзда мени сотиб юбориш ҳақида гап-сўзлар юрганди, бироқ кейинчалик Хави тактик тизимни ўзгартирди, мен кўпроқ ўйнай бошладим ва майдонда эркинликка эга бўлдим», – дея Испания ОАВлари де Йонгнинг сўзларидан иқтибос келтирмоқда.
Маълумот ўрнида, Френки 2019 йилдан буён «кўк-анорранглилар» шарафини ҳимоя қилиб келмоқда. Жорий йилнинг 12 май куни нидерландиялик футболчи 29 ёшни қарши олди.
