41 ёшли португалиялик форвард Криштиану Роналду Саудия Арабистони чемпионати тўпурарлар пойгасида учинчи ўринни эгаллади. Фаолиятида илк бор ушбу мамлакат чемпионига айланган футболчининг ҳисобида 28 та гол (2 таси пенальтидан) мавжуд.

Чемпионлик тақдири ҳал бўлган сўнгги турда Роналду «Дамак» дарвозасига иккита гол урди — бирини жарима зарбасидан, иккинчисини эса ўйиндан киритди. Шунга қарамай, унга етакчиларга етиб олиш насиб этмади.

Тўпурарлар пойгасида 32 та гол билан иккинчи поғонани «Ал-Аҳли» сафида тўп сураётган ва илгари «Брентфорд» шарафини ҳимоя қилган англиялик Айвен Тоуни эгаллади. Биринчи ўрин эса Мексика терма жамоаси аъзоси Хулиан Киньонесга насиб этди. У «Ал-Қодисия» клуби таркибида рақиблар дарвозасини нақд 33 бор ишғол қилишга муваффақ бўлди.