«Арсенал», «Ювентус», «Интер» ва «Ман Сити» собиқ ярим ҳимоячиси Патрик Виейра уни «Реал»га тўрт марта таклиф қилишгани ҳақида сўзлаб берди.
«Футболдаги бутун фаолиятим давомида фақат бир нарсадан афсусланаман — «Реал»га ўтмаганимдан. «Арсенал»да ўйнаб юрган вақтларимда (франциялик футболчи 1996 йилдан 2005 йилгача лондонликлар сафида тўп сурган) менга тўрт йил давомида шундай таклиф билан чиқишган. Сўнгги бор мен «ҳа» деб жавоб бергандим, ҳамма нарса келишиб бўлинган эди. Лекин кейин ўйланиб қолдим — мен «Арсенал»ни ҳаддан ташқари яхши кўрардим.
Мадридга «Манчестер Сити» элчиси сифатида борганимда, Флорентино Перес менга: Сен «Реал» таклифини рад этган ягона ўйинчи эдинг, деганди», — дея хотирлайди 49 ёшли жаҳон ва Европа чемпиони La Gazzetta dello Sport нашрига берган интервьюсида.
