Ҳужумчи Маркус Рэшфорд Англия терма жамоасининг ЖЧ-2026 учун якуний қайдномасига киритилганига ўз муносабатини билдирди.

Англиялик футболчи ижтимоий тармоқдаги саҳифасида «сторис» жойлаштириб, унда Унаи Эмери, Ханси Флик, Томас Тухель, «Астон Вилла», «Барселона» ва Англия терма жамоасини тилга олди. Бироқ у деярли 20 йил давомида тизимида ҳаракат қилган «Манчестер Юнайтед» клубини эслаб ҳам ўтирмади.

«Оғир дамларда менга ишонганликлари учун Унаи, Ханси, Томас, «Астон Вилла», «Барселона» ва Англия терма жамоасига алоҳида миннатдорчилик билдираман», — деб ёзди Рэшфорд.

Эслатиб ўтамиз, 28 ёшли ҳужумчининг трансфер ҳуқуқи ҳанузгача «МЮ»га тегишли ҳисобланади. У жорий мавсумни ижара асосида «Барселона»да ўтказди, ўтган мавсумнинг бир қисмида эса «Астон Вилла» шарафини ҳимоя қилган эди.