Испания терма жамоасининг собиқ ярим ҳимоячиси Тьяго Алькантара «Барселона» мураббийлар штабини тарк этди. Бу ҳақда таниқли журналист Фабрицио Романо хабар берди.
35 ёшли испаниялик мутахассис энди Ханс-Дитер Фликнинг техник ёрдамчиси сифатида ишламайди. Алькантара 2024 йилда футболчилик фаолиятини якунлаганидан сўнг германиялик мураббий штабига кирган эди.
Тьяго — «кўк-анорранглилар» тарбияланувчиси ҳисобланади ва 2007 йилдан 2013 йилгача жамоа шарафини ҳимоя қилган. Каталония клубидан кетгач, ярим ҳимоячи «Бавария» ва «Ливерпуль» сафида ҳам тўп тепган.
Эслатиб ўтамиз, Флик бошчилигидаги жамоа аввалроқ Испания чемпионатида муддатидан аввал чемпионлик унвонини қўлга киритган эди.
