Хосеп Гвардиола «Манчестер Сити» бош мураббийи лавозимини тарк этиш ҳақидаги қарорини изоҳлади. Бугун клуб мавсум якунида мутахассис истеъфога чиқишини расман эълон қилди. Гвардиоланинг сўзларига кўра, у кетиш вақти келганини англаб етган.

«Мендан кетишимнинг сабаблари ҳақида сўраманг. Аниқ бир сабаб йўқ, аммо қалбимнинг тубида бу менинг вақтим келганини биламан. Ҳеч нарса абадий эмас, агар шундай бўлганида, мен ҳали ҳам шу ерда бўлардим. Абадий қоладиган нарсалар — бу ҳиссиётлар, одамлар, хотиралар ва менинг «Манчестер Сити»га бўлган муҳаббатимдир... Хонимлар ва жаноблар, ишончингиз учун раҳмат. Мени олдинга чорлаганингиз учун раҳмат. Менга кўрсатган меҳрингиз учун раҳмат... Бу жуда ажойиб саргузашт эди. Барчангизни севаман», — дея Гвардиоланинг сўзларини келтиради «Манчестер Сити» расмий сайти.

Хосеп Гвардиола 2016 йилдан буён «Манчестер Сити» бош мураббийи лавозимида ишлаб келаётган эди. Унинг бошчилигида жамоа 20 та совринни қўлга киритди.