Италияда мавсумнинг энг яхши мураббийи аниқланди. Ушбу номга "Интер" клуби устози Кристиан Киву сазовор бўлди. Бу ҳақдаги маълумот А Серия расмий сайтида эълон қилинди.

Руминиялик мутахассис "нерадзуррилар"ни Италия чемпионатининг олтин медалларига олиб чиқди. Ўтказилган 37 тур давомида "Интер" 86 очко жамғаришга муваффақ бўлди.

Киву ушбу мукофотни 23 май куни "Болонья"га қарши бўлиб ўтадиган сўнгги тур учрашуви олдидан қабул қилиб олади. Аввалроқ мавсумнинг энг яхши футболчиси номинациясида миланликлар ҳимоячиси Федерико Димарко ғолиб чиққани ҳақида хабар берилган эди.

Эслатиб ўтамиз, Киву "Интер" бош мураббийи этиб 2025 йилнинг ёзида тайинланганди. Унгача руминиялик мутахассис "Парма" жамоасини бошқарган.