Франция футбол федерацияси (ФФФ) президенти Филипп Диалло ЖЧ-2026 олдидан ўқув-машғулот йиғинлари бошланишида терма жамоа футболчилари билан учрашди. L'Equipe хабарига кўра, у ўйинчилардан жаҳон чемпионатида иштирок этганлик учун бериладиган бонусларни камайтиришга рози бўлишларини сўраган.
Манбанинг маълум қилишича, ФФФ бундай чораларга қўл урди, чунки ФИФА томонидан ажратиладиган мукофот пуллари ҳозирча кутилган миқдорда эмас, доллар курсининг еврога нисбатан ноқулайлиги, шунингдек, мусобақа билан боғлиқ харажатларнинг жуда юқорилиги сабабли федерация бюджетни тежашга мажбур бўлмоқда.
Nike компанияси билан тузилган 100 миллион евролик рекорд даражадаги шартномага қарамай, Франция футбол федерацияси бир неча ойдан буён барча миллий терма жамоалар кесимида харажатларни қисқартиришга ҳаракат қилмоқда.
Ҳозирча бу борада якуний қарор қабул қилинмаган. Франция терма жамоаси ЖЧ-2026 га тайёргарлик кўриш учун 28 май куни Клерфонтенда йиғилади.
Эслатиб ўтамиз, 2026 йилги жаҳон чемпионати 11 июндан 19 июлгача АҚШ, Канада ва Мексикада бўлиб ўтади. Франция терма жамоаси гуруҳ босқичида Сенегал, Ироқ ва Норвегия термалари билан куч синашади.
