Fransiya futbol federasiyasi (FFF) prezidenti Filipp Diallo JCH-2026 oldidan o‘quv-mashg‘ulot yig‘inlari boshlanishida terma jamoa futbolchilari bilan uchrashdi. L'Equipe xabariga ko‘ra, u o‘yinchilardan jahon chempionatida ishtirok etganlik uchun beriladigan bonuslarni kamaytirishga rozi bo‘lishlarini so‘ragan.
Manbaning ma’lum qilishicha, FFF bunday choralarga qo‘l urdi, chunki FIFA tomonidan ajratiladigan mukofot pullari hozircha kutilgan miqdorda emas, dollar kursining yevroga nisbatan noqulayligi, shuningdek, musobaqa bilan bog‘liq xarajatlarning juda yuqoriligi sababli federasiya byudjetni tejashga majbur bo‘lmoqda.
Nike kompaniyasi bilan tuzilgan 100 million yevrolik rekord darajadagi shartnomaga qaramay, Fransiya futbol federasiyasi bir necha oydan buyon barcha milliy terma jamoalar kesimida xarajatlarni qisqartirishga harakat qilmoqda.
Hozircha bu borada yakuniy qaror qabul qilinmagan. Fransiya terma jamoasi JCH-2026 ga tayyorgarlik ko‘rish uchun 28 may kuni Klerfontenda yig‘iladi.
Eslatib o‘tamiz, 2026 yilgi jahon chempionati 11 iyundan 19 iyulgacha AQSH, Kanada va Meksikada bo‘lib o‘tadi. Fransiya terma jamoasi guruh bosqichida Senegal, Iroq va Norvegiya termalari bilan kuch sinashadi.
