«Порту» клуби ўз расмий сайти орқали ҳужумчи Люк де Йонг ёзда жамоадан кетишини эълон қилди. Клуб 35 ёшли нидерландиялик футболчи билан шартномани узайтирмайди ва унга келажакдаги фаолиятида омад тилади.
Форвард «Порту»га 2025 йилнинг август ойида ПСВдан ўтган эди. Жамоа сафидаги тўртинчи ўйинида у ўзининг дебют голини урди, бироқ ўша учрашувда жароҳат олди. Ноябрь ойида де Йонг сафга қайтганига қарамай, уч ўйиндан сўнг тизза пайларини жиддий шикастлаб, мавсум охиригача майдондан четда қолди.
Эслатиб ўтамиз, Люк де Йонг ўз фаолияти давомида «Севилья», «Барселона», Мёнхенгладбахнинг «Боруссия»си, «Ньюкасл», «Твенте» ва «Де Графсхап» каби клубларда тўп сурган. Шунингдек, у Нидерландия терма жамоаси сафида 39 та ўйинда иштирок этиб, 8 та гол уришга муваффақ бўлган.
