«Тоттенхэм» бош мураббийи Роберто де Дзерби мавсумнинг «Эвертон»га қарши ҳал қилувчи ўйинига бормасликка қарор қилган жамоа сардори Кристиан Ромерони қўллаб-қувватлади. Тиззасидан олган жароҳатидан соғаяётган ҳимоячи Аргентинага учиб кетган ва у ерда «Бельграно» ҳамда «Ривер Плейт» ўртасидаги баҳсга ташриф буюради.

«Ҳамма етакчилар ҳам бир хил эмас. Бен Дэвис жамоа билан қолишни истади, Ромеро эса бошқа йўлни танлади. Бироқ мен учун ҳеч нарса ўзгаргани йўқ», — дея мураббийнинг сўзларидан иқтибос келтиради Bein Sports.

Италиялик мутахассис футболчининг ҳаракатини худбинлик деб ҳисобламаслигини таъкидлади: «Агар футболчи фақат ўзи ҳақида ўйлаётганини кўрганимда, бошқача муносабат билдирган бўлардим. Аммо Ромеро билан менда ҳеч қачон муаммо бўлмаган».

Сўнгги тур олдидан «Тоттенхэм» хавфли ҳудуд (қуйи лигага тушиб кетиш зонаси) яқинида турибди. АПЛдаги ўрнини сақлаб қолиш учун жамоага «Эвертон» устидан ғалаба зарур, дуранг ҳам «шпорлар»га қўйилган вазифа ижросини кафолатлаши мумкин.