«Арсенал» бош мураббийи Микель Артета клубнинг Чемпионлар Лигасида ғалаба қозониш истагини билдирди. 30 май куни бўлиб ўтадиган финалда «канонирлар» «ПСЖ» билан тўқнаш келишади.

«Биз талаблар даражасини янги чўққига олиб чиқдик. Бугунги кунда биз турган нуқта — АПЛ чемпионлиги. Энди эса навбатдаги босқичга кўтарилишимиз керак, у эса олти кундан сўнг Будапештда содир бўлади: биз Чемпионлар Лигасида ғолиб чиқишимиз шарт, буни барчамиз жуда яхши англаб турибмиз.

Айни дамда ягона мақсадимиз — шу чўққини забт этиш. Жамоадаги, йигитлар ва клуб атрофидаги барча инсонлардаги энергия мисли кўрилмаган даражада. Кўпчилик бир-бирини жуда яхши билади, улар нафақат жамоадош, балки бир оиладир.

Сиз уларнинг кўзидаги қувончни, шу билан бирга, улкан амбицияни ҳам кўриб турибсиз. Биз буни уддаладик [АПЛда ғолиб бўлдик], аммо энди бизга бошқа нарса керак. Чемпионлар Лигасидаги бу мавсумда босиб ўтган йўлимизни инобатга олсак, майдонга чиқиб, ғалаба қозонишга қодирлигимизга мутлақо ишончимиз комил бўлиши керак», – деди Артета.