«Ювентус» вингери Кенан Йилдиз пайшанба куни машғулот чоғида болдир мушагида оғриқ сезгани сабабли «Торино»га қарши ўйинда иштирок эта олмайди.
La Gazzetta dello Sport нашрининг хабар беришича, футболчи тиббий кўрикдан ўтган ва текширув натижалари клуб кутганидек ижобий чиқмаган.
21 ёшли футболчи сўнгги пайтларда ўзини безовта қилаётган тендинопатияга (пайларнинг шикастланиши ёки тузилишининг ўзгариши билан боғлиқ патологик ҳолат) қарамай, оғриқларга чидаб майдонга тушишга мажбур бўлаётган эди. Энди эса унинг учун мавсум муддатидан аввал якунланди.
«Ювентус» якшанба куни А Серия 38-тури доирасида сафарда «Торино» меҳмони бўлади. Ҳозирда Лучано Спаллетти шогирдлари турнир жадвалида 6-ўринда бормоқда. Чемпионлар Лигасига йўлланма олиш учун «бьянконерилар» нафақат дербида ғалаба қозониши, балки асосий рақобатчилари («Милан», «Рома» ва «Комо») ўз ўйинларида очко йўқотишига умид қилишлари керак.
