«Барселона» бош мураббийи Ханси Флик каталонияликлар сафидаги мақсадлари ва жамоанинг келажаги ҳақида фикр билдирди. Немис мутахассиси қўл остида «кўк-анорранглилар» кетма-кет икки мавсум Ла Лигада чемпионликни қўлга киритди.

«Пеп Гвардиола даврида нималар бўлганини билмайман, лекин ҳозир бу ерда ажойиб даврни ўтказяпмиз ва ўз йўлимизда давом этяпмиз. Ҳозиргача бешта совринни қўлга киритдик, аммо биз янада кўпроғига чанқоқмиз. Жамоани янада кучайтиришимиз керак – биз айнан шунга эътибор қаратганмиз. Бу клубнинг келажаги», – деди Флик.

Мураббий Чемпионлар лигасидаги ғалаба ҳам асосий мақсадлардан бири эканини яширмади.

«Мен титуллар ютиш ғоясига 100 фоиз содиқман ва Чемпионлар лигасида ғолиб чиқиш учун қаттиқ меҳнат қиламиз. Шунингдек, Ла Лигада кетма-кет учинчи бор чемпионликни қўлга киритишга 100 фоиз мотивация билан ёндашяпмиз. Биз энг яхши ўйинимизни кўрсатишимиз шарт – бу бизнинг бош мақсадимиз. Бунга эришиш учун бор кучимизни ишга соламиз», – дея қўшимча қилди мураббий.