«Ливерпуль»нинг собиқ ҳимоячиси Йон-Арне Риисе «Манчестер Сити» ҳужумчиси Эрлинг Ҳоланднинг «Олтин тўп»ни қўлга киритиш имкониятлари ҳақида ўз фикрларини билдирди. Норвегиялик форвард жорий мавсум АПЛда 35 та ўйинда 27 та гол уришга муваффақ бўлди.

Риисенинг фикрича, Холанд бу нуфузли совринга анча аввал лойиқ кўрилиши керак эди. Бироқ ҳозирги рақобат шароитида норвегиялик футболчига қийинроқ бўлади:

«Ҳозир кўплаб иқтидорли ўйинчилар порламоқда. Эрлинг «Олтин тўп»ни икки йил олдин ютиши керак эди. Агар у ҳозир бу совринни олмоқчи бўлса, у ўйнайдиган тизимда жуда кўп гол уриши шарт. Чунки Ламин Ямал ва Майкл Олисе каби ўйинчилар майдонда кўпроқ кўзга ташланмоқда, уларнинг ўйин услуби мухлисларга кўпроқ ёқмоқда. Агар Эрлинг ажойиб голлар уришда давом этса, уни эътиборсиз қолдириб бўлмайди. Одамлар унинг мавсумини «омадсиз» деб аташмоқда, лекин у ҳали ҳам ақл бовар қилмайдиган даражада гол уряпти. Унга рекордлар керак, эҳтимол, АПЛнинг янги рекордини ўрнатиши лозим. Шундагина у «Олтин тўп»га эга чиқади», – деди Риисе.