«Бавария» Германия Кубоги финалида «Штутгарт»дан устун келди — 3:0. Учрашув Берлиндаги «Олимпиаштадион» стадионида бўлиб ўтди.
55-дақиқада Харри Кейн ҳисобни очди, асосий вақт тугашига ўн дақиқа қолганида эса инглиз ҳужумчиси дублни расмийлаштирди. Ҳакам томонидан қўшиб берилган вақтда форвард пенальтини аниқ амалга ошириб, хет-трикка эришди.
Мюнхен жамоаси ўз тарихида 21-бор ва 2020 йилдан бери илк марта Германия Кубоги соҳибига айланди. Бу мусобақанинг янги рекорди ҳисобланади. Титуллар сони бўйича иккинчи ўринда «Вердер» бормоқда — уларда олтита кубок мавжуд.
«Штутгарт» эса кетма-кет иккинчи марта финалда ўйнади. «Шваблар» ўз тарихида тўрт бор Германия Кубогини қўлга киритишган.
